‘Do t’ua bëjmë ferr’, Rama lajmëron ndëshkime drastike për shkelësit e rregullave

Me anë të një statusi në llogarinë e tij të Facebook-ut kryeministri Edi Rama ka paralajmëruar masa të reja ndëshkimore për këdo që thyen rregullat e vendosura nga qeveria. Ai shprehet se personave që nuk zbatojnë ligjin, do t’iu heqet liria, pra sjelljet e tyre do kthehen në ferr për vetë ata.

Rama ka lajmëruar se Ushtria dhe policitë bashkiake do të krijojnë kordonët sanitarë të tregjeve, ndërsa policia e shtetit do të godasë shkelësit me masa të reja.

Statusi i plotë:

“Nëse ky është niveli i kuptimit të detyrës njerëzore, qytetare e atdhetare, në frontin e kësaj lufte për jetë a vdekje dhe meqë mesa duket ecurinë pozitive të luftës deri tani, shumëkush po e kupton gabimisht si arsye për t’u lëshuar me idenë se s’na gjen gjë, atëherë përgjigja e shtetit do të jetë reciproke për këdo që nuk do të hyjë në rresht për të mbajtur radhë!

Ushtria dhe policitë bashkiake do të shtrëngojnë urgjentisht kordonët sanitarë të tregjeve. Policia e shtetit do të godasë shkelësit me masa të reja ndëshkimore!

Masat e reja ndëshkimore do të jenë ligj ditën e hënë dhe për kokëshkretët do të shkohet deri në heqje lirie! Nëse do të lehtësojmë me pikatore popullin e përgjegjshëm, kokëshkretëve do t’ua bëjmë ferr këtë vijë të shtrembër sjelljeje që na fut në zjarrin e ferrit të gjithëve!

Tirana është vatra më e rrezikshme e luftës. Durrësi njësoj si tirana mund të kthehet në vaterlonë tonë. Shkodra është tanimë një bombë me sahat. Fieri është një rrezik i madh potencial. Kudo mund të na iki avantazhi që kemi krijuar, nëqoftëse do ta bëjmë si kombëtarja kuqezi që pjesën e parë duket sikur do fitojë, pastaj… Harrojeni, këtë luftë nuk kemi për ta humbur për ata që s’kanë mendje dhe këllqe të luftojnë si mbarë populli shqiptar.”